وش هي بطاقة الولاء الرقمية وكيف تسويها لمحلك
بطاقة الولاء الرقمية بطاقة أختام أو نقاط تنحفظ في محفظة أبل أو جوجل في جوال عميلك بدل الكرت الورقي. يضيفها بمسح رمز QR بلا تطبيق، وموظفك يختم من جواله، ولما تكتمل الأختام تجهز مكافأته ويسلمها له موظفك.
برنامج الولاء والبطاقة: وش الفرق؟
برنامج الولاء هو القاعدة اللي تكافئ فيها عميلك لأنه رجع لك. مثل: كل زيارة بختم، ولما يكمل الأختام ياخذ مكافأة.
وبطاقة الولاء هي المكان اللي ينحفظ فيه رصيده. الورقية كرت في جيبه، والرقمية بطاقة في محفظة جواله تتحدث لحالها مع كل ختم.
في ثانية ولاء تحدد أنت القاعدة والمكافأة، والبطاقة توصل لمحفظة أبل في الآيفون أو محفظة جوجل في أندرويد.
طريقة عمل بطاقة الولاء الرقمية
بطاقة الولاء الرقمية تشتغل بين ثلاثة: عميلك ينضم من جواله، وموظفك يختم من تطبيق على جواله، وأنت تتابع وتعدل من تطبيقك أو من الموقع.
| مين | وش يسوي | من وين |
|---|---|---|
| عميلك | يمسح الرمز، ويكتب اسمه وجواله، ويضيف البطاقة لمحفظته | من جواله، بلا تطبيق ولا حساب |
| موظفك | يمسح بطاقة العميل فينضاف الختم، ويسلم المكافأة لما تكتمل | تطبيق مساعد ثانية |
| أنت | تسوي البطاقة، وتعدل المكافأة، وتتابع عملاءك، وترسل لهم عروض | تطبيق ثانية أو حسابك في الموقع |
كيف يضيفها عميلك لجواله
عميلك ما يحمل تطبيق ولا يسوي حساب. يمسح رمز QR تحطه عند الكاشير، أو يفتح رابط بطاقتك، ويكتب اسمه ورقم جواله، ثم يضيف البطاقة لمحفظة أبل في الآيفون أو محفظة جوجل في أندرويد.
بعدها يشوف في بطاقته كم ختم جمع وكم باقي على هديته. وكل ختم جديد يظهر فيها خلال ثوان، وفي الآيفون يوصله إشعار على شاشة القفل.
والتفاصيل في بطاقة ولاء في محفظة أبل وجوجل.
كيف يختم موظفك، أو تختم أنت
موظفك يختم من تطبيق مساعد ثانية على جواله: يمسح بطاقة العميل بالكاميرا فينضاف الختم، ولما تكتمل البطاقة يسلم المكافأة بضغطة.
وإذا ما عندك موظف، تختم أنت من حسابك في الموقع من أي جوال، وفي الآيفون من تطبيق ثانية: تكتب آخر أربعة أرقام من جوال العميل، وتضغط «اختم».
- موظفك تضيفه أنت من تطبيقك، ويدخل مساعد ثانية ببريد وكلمة مرور.
- إذا تعذر المسح، يبحث الموظف عن العميل باسمه أو رقم جواله.
- إذا انقطعت الشبكة، يحفظ مساعد ثانية الختم ويرسله لما ترجع.
- مساعد ثانية بالعربي والإنجليزي، وفي الآيفون بسبع لغات منها الأردية والهندية.
وش يفرق عن الكرت الورقي
الفكرة نفسها: ختم مع كل زيارة، ومكافأة في الآخر. والمقارنة كاملة في كرت الأختام الورقي أو بطاقة في الجوال.
الفرق باختصار:
- ما يضيع: البطاقة في جوال عميلك، وإذا غير جواله يرسل له موظفك رابط بطاقته برصيدها.
- كل ختم مسجل: مين ختم ومتى، وتقدر تحدد كم ساعة بين ختم وختم.
- تعرف عملاءك: عندك اسم كل عميل وجواله ورصيده، بدل كرت ما تدري مين صاحبه.
- توصل لهم: ترسل عرض يظهر على بطاقتهم في المحفظة.
أختام ولا نقاط؟
تختار نوع بطاقتك من 9 أنواع، منها الأختام والنقاط والكاش باك والاشتراك.
بطاقة الأختام أقرب نوع للكرت الورقي، وهي النوع الوحيد في الباقة المجانية. وباقي الأنواع من باقة البداية.
وتلقى كل نوع ومتى يناسب في أختام ولا نقاط ولا كاش باك.
كيف تسوي بطاقة ولاء لمحلك
تسويها بنفسك من صفحة إنشاء البطاقة في خمس خطوات، وتشوف بطاقتك تتغير قدامك مع كل خطوة. وما يطلب منك حساب إلا في آخر خطوة، بجوجل أو بريدك، وتصميمك يبقى محفوظ.
مثلا الإعداد الجاهز للمقهى: بطاقة الأختام من 9 أختام، والمكافأة «قهوتك التالية علينا».
- النشاط: تختار نوع محلك، وتجيك البطاقة بالإعداد الجاهز عند اختيار النشاط، وتقدر تعدله.
- الاسم: تكتب اسم محلك مثل ما يعرفه عملاؤك، ورقم واتساب لو تبي.
- المكافأة: تختار نوع البطاقة، وكم ختم، ووش يكسب عميلك.
- الشكل: تختار لون بطاقتك من ألوان جاهزة.
- الإطلاق: تراجع البطاقة وتضغط إنشاء، فيطلع لك رابطها ورمز QR تحطه عند الكاشير.
تبدأ مجانا
الباقة المجانية دائمة وما تنتهي، وحدودها: حتى 25 عميلا و150 ختما في المجموع، وبطاقة ولاء واحدة، وموظف واحد.
وإذا احتجت أكثر، باقة البداية من الموقع 50 ر.س / شهر، وفيها عملاء بلا حد وأختام بلا حد. والأسعار كاملة في كم تكلف بطاقة الولاء وصفحة الأسعار.
وقبل ما تبدأ، جرب بنفسك: افتح بطاقة التجربة من جوالك وأضفها لمحفظتك بنفس خطوات عميلك.
أسئلة عن بطاقة الولاء الرقمية
أحتاج حساب عشان أجرب البطاقة؟
لا. تصمم بطاقتك كاملة في صفحة الإنشاء بلا حساب، والحساب يطلب منك عند الإطلاق فقط. وتقدر تضيف بطاقة التجربة لمحفظة جوالك وتشوفها مثل ما يشوفها عميلك.
وش لو عميلي ما أضاف البطاقة لمحفظته؟
بعد ما يسجل تفتح له بطاقته في المتصفح، وفيها رمز يعرضه للكاشير. ويقدر يضيفها لمحفظة أبل أو جوجل من الصفحة نفسها.
أقدر أحط شعاري وألوان محلي على البطاقة؟
كل بطاقة تبدأ بألوان وأيقونة نشاطك، وتختار لونها من ألوان جاهزة في كل الباقات. ومصمم البطاقة بشعارك وألوانك وشكل ختمك من باقة البداية.
وش يصير لو انختم لعميل غلط؟
إذا ختمت أنت من حسابك في الموقع، تتراجع عنه خلال عشر دقائق ما دام المكافأة ما تسلمت، وفي الآيفون يقدر الموظف يتراجع عن ختمه بنفس الشرط. وغير كذا تعدل رصيد العميل أنت من حسابك.
والأسئلة العامة عن المحفظة والباقات في الأسئلة الشائعة.
جرب بطاقة تجريبية في جوالك، ثم سو بطاقة محلك.